Oд каде потекнува болката во мускулите после тренинг?

Споделете со пријателите

Сигурно сте искусиле воспаление и болка во мускулите после првиот тренинг по долга пауза или кога сте се обиделе да го дадете својот максимум или пак кога сте го промениле начинот на тренирање/сте пробале нов тренинг……Тешко ви е да се симнете по скалите, поради болката во стомачните мускули не можете да се смеете, рацете ве болат дури и при подигање на шољата со кафе….тоа се знаци дека имате мускулно воспаление.

Кога станува збор за воспаление на мускулите кое се јавува после тренинг, вообичаено се мисли на болка во мускулите кои биле активни за време на тренингот. Освен болката се јавува и чувство на затегнатост и крутост во мускулите, а во одредени ситуации и слабост. Иако овие симптоми се непријатни, сепак за некого претставуваат слатка болка знаејќи дека извежбале правилно претходниот ден.

Воспалението во мускулите е сосема природна и корисна појава. Тоа се јавува после тренинг и претставува процес на регенерација и раст на мускулите, кој вообичаено трае од 48 до 72 часа после тренинг.

Man-tired-after-workout-640x427

Што всушност се случува во мускулите после тренинг и од каде потекнува болката ?

После интензивен тренинг доаѓа до микрооштетување во структурните мускулни влакна. Телото поради тоа реагира со мноштво сложени биохемиски процеси во кои се лачат различни хормони и имунолошки фактори. Најпрвин се зголемува крвниот проток околу оштетениот мускул. Потоа доаѓа до зголемување на пропусливоста на крвните садови со што им се овозможува на воспалителните имунолошки клетки полесно да дојдат до болното место. За мускулното воспаление најзначајна е акумулацијата на клетки на имуниот систем наречени макрофаги околу оштетените мускулни влакна. Овие клетки се т.н чистачи и нивна задача е да ги отстранат оштетените клетки и ткива во организмот. Постои уште еден интересен факт во врска со макрофагите. Поточно, макрофагите ја зголемуваат концентрацијата на азотен оксид (NO), што резултира со вазодилатација, што значи поголем проток на хранливи материи кои се вклучени во изградба и регенерација на мускулите. Всушност, макрофагите индиректно се вклучени во процесот на мускулен раст.

Освен наведените процеси кои се дел од овој воспалителен процес, доаѓа и до пореметување на рамнотежата на калциумовиот јон (одговорен за контракција на мускулите), зголемување на концентрацијата на одредени воспалителни клетки (цитокини) и зголемување на концентрацијата на слободните радикали.

Што е со млечната киселина и дали таа е одговорна за болката во мускулите?

Сигурно сте слушнале дека наталожената млечна киселина во мускулите е причината за болка после напорен тренинг.

Но, да тргнеме од почеток..што е всушност млечната киселина и како се создава во мускулите?

За време на тренинг дишењето се забрзува со цел повеќе кислород да се однесе до мускулите. Најдобар начин за продукција на енергија во телото е аеробното клеточно дишење кое е овозможено од кислородот. Но, при напорен тренинг телото неможе да постигне да донесе доволно кислород до мускулите за да произведе толку енергија колку што е потребно и затоа доаѓа до активација на анаеробиот процес на ослободување на енергија во мускулните клетки. Оваа енергија доаѓа од глукозата преку процес наречен гликолиза каде глукозата се метаболизира во супстанца наречена пируват. Кога телото има доволно кислород, пируватот продолжува да се оксидира преку аеробниот пат на оксидација овозможен од кислород при што се добива енергија. Но, кога кислородот е ограничен што е случај при вежбање, телото привремено го претвара пируватот во лактат/млечна киселина. Лактатот не останува долго во мускулите, тој оди во крвта и се носи во црниот дроб каде повторно се претвара во глукоза преку процес наречен глуконеогенеза. Конвертираната глукоза повторно се враќа во крвта и оди до мускулите каде се користи за продукција на енергија.

Untitled

Клучната разлика од анаеробното и аеробното ослободување на енергија е тоа што со аеробниот процес се ослободува многу повеќе енергија, односно една молекула на глукоза ослободува 38 молекули ATP, додека со анаеробиот процес се добиваат само 2 молкули ATP.

Исто така интересно е да се знае дека во мускулите се складира енергија во форма на фосфокреатинин. Фосфокреатининот е одговроен за ослободување на додатно количество енергија кое е потребно за мускулните контракции.

Иако порано се мислело дека болката во мускулите потекнува од лактатите денес е јасно дека лактатите не се причината за мускулните болки. Во деновите по напорен тренинг или спортување нивоата на лактат во крвта и ткивата се покачуваат единствено за време на напорен тренинг, и истите се враќаат во нормала по 45 минути до еден час, па така часовната разлика не оди во прилог тие да бидат причина за болката во наредните денови.

Заклучок:

Болката во мускулите по напорен тренинг потекнува од микроскопските оштетувања и раслојувања на мускулните влакна поради стресот кој што го трпат како и поради продукцијата на разни инфламаторни клетки.

Акутната болка во мускулите е нормална појава која се јавува после тренинг и е знак дека правилно сте извежбале. Тоа е процес во кој доаѓа до регенерација и раст на мускулите. За полесно да го наминете воспалението, бидете активни, следниот ден направете полесен тренинг, пешачете или истегнете се (видео за истегнување). Исто така за да ја намалите болката не правете големи паузи и не претерувајте со тренингот. Хранете се здраво и внесувајте доволно течности. Овозможете си добар сон, затоа што единствено додека спиеме телото вистински се регенерира.

Прочитајте повеќе ако ве интересира:

Што се случува со телото докулку не јадете после вежбање?

5 лесни и брзи идеи за оброк после вежбање

Драгана Младеновска

Аеробик и пилатес инструктор, Сопственик на FitLife Fitness Studio, Магистeр по фармација и диететика.

Leave a Reply

Your email address will not be published. Required fields are marked *