Искористете ги скалите поинаку

Споделете со пријателите

Сите ние безброј пати сме ја слушнале приказната дека качувањето по скали е добра и здрава работа, ама сепак кога треба да се качиме некаде доколку има електрични скали (лифт), ја бираме втората варијанта со оправдување пред себе си “се брзам , сега немам време , следниот пат и сл”. Забораваме дека, навистина оваа мала физичка активност има повеќекратна корист за нашето тело. Со нејзино редовно практицирање се чувствуваме освен физички и духовно подобро. Доколку пак го забрзаме темпото и качувањето го збогатиме со неколку интензивни вежби, овој исклучително добар и редовен начин на раздвижување на телото може да се претвори во добар тренинг.

Kачувањето по скали ја нагласува вашата физичка сила и кондиција. Со тек на време, влијае на зголемување на флексибилноста на телото, помага за добар развој на долниот дел од телото, ја забрзува работата на срцето. Кардио интервалите трошат многу калории и прават да се чувствувате подобро. Се што ви треба е добра воља, добар план на активност и скали, за почеток не повеќе од 15.

Малку ќе ви помогнеме во организирањето на планот за оваа физичка активност.

Загревање

Почнуваме со загревање, се качувате по скалите со цврст и исправен став на телото. Внимателно се спуштате надолу со одење. Ова го правите неколку пати. Потоа повторувате уште толку, ама со забрзано темпо. Поставете си цел, во почетокот качете се и симнете се 10 пати со нормално темпо и 10 пати со брзо темпо. Следниот ден зголемете на 15, потоа на 20………

Првата вежба по загревањето е исчекор

Застанете пред првата скала и двете колена ги свиткувате во исчекор, внимавајте коленото да не го прејде стапалото. Земете залет со рацете и кренете се со десната нога, па со левата наизменично до врвот на скалите. Се спуштате надолу со одење.

Трчање на страна

Стапалата се паралелни со скалите, со трчање одите до врвот на скалите, со лесно одење се спуштате назад. Повторувате по неколку пати и на левата и на десната страна.

Склекови

Рацете ставете ги на првата или втората скала во ширина на рамената, заземете став на склекови и со свиткани лакти лесно се спуштате до скалата и се кревате, направете 10 повторувања. Внимавајте на цврстината на телото.

За дополнителен интензитет помеѓу вежбите повторете ја првата вежба. Неколку пати истрчете ги скалите.

Чучнувања со скокови

Чучнувања со скокови е малку потешка вежба, но кога веќе ќе стекнете одредена кондиција, нема да ви биде тешко. Внимавајте на положбата на телото и земајте добар залет со рацете. Назад од врвот на скалите секогаш се враќате со одење. Правете ја вежбата на почетните скалила, повторете 2 пати по 10 пати со пауза од 30 секунди помеѓу сериите.

Овие неколку вежби се сосема доволни за ефективна активност на телото. Доколку сметате дека не сте извежбани, повторете ги сите од почеток уште еднаш или двапати.

Едноставно, ефективно и интензивно вежбање. Не чекајте, доколку сакате физичка активност ова е одличен начин.