Го избравме карфиолот затоа што е многу вкусен, има многу малку калории (околу 25 калории на 100 g), но од друга страна има голема нутритивна вредност. Тој е голем извор на витамин Ц, витамини од групата Б и тоа особено фолна киселина. Карфиолот е богат и со многу минерали кои го штитат и чуваат нашето здравје.
Еве ги потребните состојки за подготовка на 12 бургери од карфиол и јајца:
- 400-500 g свеж карфиол
- 2 јајца
- 1 кромид со средна големина
- 1-2 чешниња лук
- малку лебни трошки (ако сакате поздрава варијанта, можете наместо лебни трошки да додадете мелени овесни снегулки)
- 1 лажица маслиново масло
- сол, оригано и црн бибер (по желба).
Начин на подготовка:
Карфиолот мора да биде варен, така што во тенџере со вода на оган оставете го да врие 5-10 минути, потребно е убаво да омекне. Кога убаво ќе омекне фрлете ја водата и убаво изгмечете го карфиолот со алатка за пире, додадете ги двете јајца, изренадајте го кромидот, ситно насечкајте го лукот, додадете маслиново масло и зачинете по желба. На крај полека додајте 1 лажица лебни трошки или овесни снегулки и мешајте, ако е потребно додадете уште 1-2 лажици. Смесата треба да биде со густина која дозволува формирање на топчиња/бургери.
На хартија за печење наредете ги бургерите и печете во загреана рерна на 200°С околу 20-тина минути дури бургерите не заруменат.
Комбинирајте ги овие вкусни бургери со свежа салата по избор.
Добар апетит!
Аеробик и пилатес инструктор, Сопственик на FitLife Fitness Studio, Магистeр по фармација и диететика.