Исхрана во бременост

Споделете со пријателите

Добрата исхрана за време на бременост ви гарантира сигурност дека на вашето бебе му ги обезбедувате потребните хранливи материи за правилен раст и развој.

Здрава исхрана во бременост подразбира баланс на внесот на нутитиенти и тоа на:

  • протеини
  • јаглехидрати
  • здрави масти и омега 3 масни киселини
  • витамини и минерали

Ако претходно сте имале здрави навики и балансиран внес на макронутритиенти, во бременоста е потребно само одредено прилагодување, но запомнете тоа прилагодување не значи оброци за двајца во никој случај!

Калориски потреби и зголемување на килограмите во бременост

Во бременост калорискиот внес на дневна база треба да биде многу малку зголемени:

  • прв триместар – околу 85 дополнителни калории
  • втор триместар околу 250 дополнителни калории
  • трет триместар – околу 350 – 400 дополнителни калории.

Зголемувањето на килограмите за време на бременоста е нормално. Оптимално зголемување е од 7-12 килограми, но оваа бројка многу зависи и од почетната тежина.

Најдобро е првиот триместар да останете на старата тежина, или да зголемите најмногу 2 килограми.

Во вториот и третиот триместар здраво зголемување на тежина е од 0.2 до 0.4 kg на недела или околу 0.8-1.6 kg месечно.

Балансирана исхрана во бременост значи внес на соодветни нутритиенти во соодветна количина.

Консумирањето на брза храна, шеќери и постојано грицкање можат да бидат причина за зголемување на килограмите многу повеќе од препорачано зголемување што води до ризик од многу компликации и во бременоста, но и после породувањето.

Имајте на ум дека зголемувањето на килограмите кај мајката не оди во корелација со зголемување на тежината и растот и развојот кај бебето, туку многу често и обратно, односно има примери на мајки кои во бременоста качиле 40 килограми, а родиле бебе од само 2 кг, а има и примери (ќе се посочам себе си) со зголемени само 5 килограми родив здраво женско бебе од 3 килограми.

Пораката од погоре напишаното ми е дека на бебето не му се потребни само калории и енергија за правилен раст и развој, туку вистински нутритиенти кои ги содржат сите неопходни состојки кои обезбедуваат вистинска поддршка за раст и развој.

Пред да посегнете по хамбургер, чоколадо, парче пица или слично размислете два пати дали вашето бебе е среќно со вашиот избор и дали парчето пица е тоа што му треба!


Можеби ќе ве интересира: Вежбање во текот на бременоста


Кои нутритиенти витамини и минерали се неопходни за здрава бременост?

Протеини

Протеините се неопходни за правилен раст и развој на бебето, за формирање на крвните садови во плацентата, но и за крвните садови на фетусот, тие се неопходни за синтеза на хемоглобин и еритроцити и се најзначајни макронутритиенти за време на бременоста. Внесот на протеини во бременоста во првиот триместар треба да биде од 0.8-1 g/kg или 10-15 % од дневните енергетски потреби да потекнуваат од протеини. Во втор и трет триместар количината на протеини на дневна база треба да биде околу 1.1 g/kg.

За тежина од околу 60 kg тоа е од 48 – 60 g во прв триместар или минимум 66 g протеини на ден во вториот и третиот триместар. Протеини има во месо, јајца, риба, млечни производи, мешунки, јаткасти плодови.

Железо

Железото е значајно затоа што учествува во формирање на хемоглобинот, а хемоглобинот носи кислород до сите ткива и овозможува генерирање на енергија која е неопходна пред се за правилен раст и развој на фетусот. Формирање на новиот крвоток на бебето исто така е мошне значаен. За време на бременоста се јавуваат зголемени потреби за железо и еден од најчестите проблеми кај трудниците е анемијата.

Потребите за железо во бременоста се околу 27 mg на ден. Железото го има и во продукти од растително, но најмногу во продукти од животинско потекло. Значајно е да се потенцира дека железото во продуктите од растително потекло има слаба апсорпција и слаба искористливост од телото затоа што се наоѓа во т.н не-хем форма за чија апсорпција е потребно витамин Ц. Хем-железото го има во месо, млечни производи во јајца и има голема и многу побрза апсорпција.

Омега –3

Омега 3 масните киселини особено докозахексаноична киселина се мошне значајни за развој на мозокот на фетусот. DHA претежно се наоѓаа во морските масни риби, иако мал процент на DHA се наоѓа и во млечни продукти и во месо. Најчесто во витамините за трудници има соодветно количество на омега-3 кое е неопходно за развој на мозокот на бебето.

Витамин Ц

Неопходен е за формирање на крвните садови, и развој на коските и забите на фетусот.

Калциум

Калциумот е неопходен за развој на коските, забите и мускулите на фетусот. Тој исто така е неопходен за нормална срцева и нервна функција. Калциумот го контролира и балансот на течности.

Масти

Мастите се неопходни во бременоста пред се за енергија која е неопходна за формирање на органите на фетусот и плацентата. Од друга страна покрај тоа што се неопходни за раст и развој тие се прекурсори за синтеза на половите хормони кои ја одржуваат бременоста. Сите полови хормони се во основа стероидни и за нивна синтеза во телото се неопходни масти. Омега три масните киселините се најважни и тоа пред се за развој на мозокот и очите на бебето.

Фолна Киселина

Фолната киселина е неопходна за правилен развој на нервниот систем т.е на рбетниот мозок. Таа исто така е неопходна за синтеза на нови крвни клетки затоа што учествува и е неопходна за процесот на репликација на ДНК кој се случува за време на делба на клетката. Доволно фолна киселина е неопходно да се спречи дефект на невралната туба.

Потребите за витамини и минерали во бременоста се малку зголемени.

Ова е табела од Светска Здравствена Организација во која можат да се видат препорачаните дози за сите витамини.

За оптимално здравје и одржување на здрава телесна тежина потребно е дневниот калориски внес  да биде во соодветен сооднос во однос на протеини, јаглехидрати и масти кои се основниот извор на енергија за телото. Бременоста не е период кога телото треба да слабее, зголемувањето на килограмите во вториот и третиот триместар е нормален процес.


Дневното мени и планот за исхрана се разликува кај секоја трудница затоа што постојат многу варијабилни фактори од индивидуа до индивидуа кои треба да се земат во предвид. Консумирањето на нутритивен и балансиран појадок, ручек и вечера во комбинација со правилна ужинка во вистинско време гарантира одлично здравје и за мајката и за бебето!

Драгана Младеновска

Аеробик и пилатес инструктор, Сопственик на FitLife Fitness Studio, Магистар по фармација и диететика.

Leave a Reply

Your email address will not be published. Required fields are marked *