Ретко кој би одбил чоколадо, но многу често јадеме, уживаме и после имаме грижа на совест за изедените калории.
За да немате грижа на совест, направете си домашно вистинско чоколадо, потребни ви се само 5 состојки и силиконски калап.
Мислам дека тоа е одличен предлог и за вкусен десерт за вашите дечиња, секогаш е подобро на нашите најмили да им даваме домашно подготвени оброци, десерти и ужини.
Од оваа количина на намирници јас добив 80 грама чоколадо, слично како од продавница 🙂
Потребни состојки:
- 2 лажици кокосово масло
- 1 лажица путер од кикиритки
- 1 лажица обичен несолен путер
- 1 лажица какао
- 1 лажичка мед или 1 лажица кокосов шеќер (може и кафеав нерафиниран)
- за кранчи ефект можете да додадете и мелени јатки или кокосов чипс (опционално).
Начин на подготовка:
Сите состојки ги мешате заедно и ги ставате во огноотпорен сад на оган на многу тивка температура да се соединат. Мешате дури не добиете еднолична и хомогена смеса (околу 4-5 минути).
Потоа смесата ја излевате во силиконски калап за чоколадо и оставате во замрзнувач за да се стегне побрзо (околу половина час максимум).
Калапот за чоколадо најверојатно може да се најде и негде кај нас, но јас немам сретнато, мојот е од алиекспрес и еве како изгледа:
Калапот е прекрасен затоа што добивате баш реално и вистинско чоколадо во кое знаете дека нема конзерванси и милион емулагатори и додатоци.
Ве предизвикувам да си направите, дури и да немате баш ваков калап може во било каков силиконски за да може лесно да се извади.
На здравје!!!
Аеробик и пилатес инструктор, Сопственик на FitLife Fitness Studio, Магистeр по фармација и диететика.