Со неколку претходни наши рецепти сигурни сме дека барем малку успеавме да ве убедиме дека и десертите можат да бидат здрави. Домашен чоколаден путер од бадеми… Звучи примамливо, зарем не? Tолку вкусен, што ќе ве освои по првото залче.
Потребна ви е само желба и малку време. Овој здрав намаз се подготвува за помалку од 15 минути, и може да биде одлична замена за висококалоричните кремови и путери.
Можете да го јадете со парчиња банана, да го намачкате на здраво интегрално лепче, со интегрални колачи, но исто така можете да го искористите и како крем за палачинки.
Потребни сосотјки:
- 100 g сирови непечени бадеми
- 2-3 лажици какао
- 1 лажица мед
- 1 лажичка путер (наместо путер може да искористите и кокосово или маслиново масло)
- неколку зрнца сол.
Како да подготвите:
Во блендер ставете ги сировите непечени бадеми. Блендирајте додека не добиете хомогена смеса како на сликата. Додајте ја солта, и со лажица повремено отстранете ги залепените бадеми од краевите додека блендирате. За максимум 10 минути ќе добиете кремаста структура.
Кога ќе добиете убава густа и хомогена смеса додајте го какаото, медот и путерот или кокосовото или маслиново масло. Убаво измешајте со лажица дури да добиете еднолична смеса. Складирајте го чоколадниот путер од бадеми во стаклена тегличка и чувајте го во фрижидер.
Освен тоа што е здрав овој намаз, полн е со омега-3 масни киселини кои помагаат за намалување на ризикот од појава на срцеви заболувања.
Гледано од калориски аспект, една мала лажичка од овој путер содржи само 36 калории. 🙂
На здравје!
