Им дадов име кокос колачиња затоа што сè што постои од кокос ставив! 😊
Ставив и брашно, и трошки, и шеќер, и масло, е не ставив кокосово млеко, но доволно е сè друго.
Инаку не знам дали забележувате, но секогаш се трудам рецептите да не ги правам со некои комплицирани намирници, нешто што знам дека е прескапо или недостапно да се купи. Кокосово брашно и шеќер кои ги користам во рецептот се можеби нешто што не сите го имате дома, но затоа ви давам супер алтернатива да го замените со мелени овесни снегулки, а кокосовиот шеќер со мед или било кој друг засладувач кој си користите.
Потребни состојки (за 15 поголеми колачиња):
- 100 g непечени бадеми
- 100 g непечени индиски ореви
- 4 лажици кокосово брашно (може да го замените со мелени овесни снегулки)
- 3 лажици кокосови трошки
- 50 g рендано темно чоколадо со минимум 70% какао
- 1 лажичка пециво
- 3 лажици кокосов шеќер (може да се замени со мед)
- 40 g или околу 3 полни лажици кокосово масло (може да се замени со маслиново масло или со путер)
- 2 јајца.
Начин на подготовка:
Најпрвин во блендер ги ставив бадемите и индиските ореви за да се измелат и направат прашкасти. Доколку решите да користите овесни снегулки наместо кокосово брашно, додадете ги и нив тука за сè да се измеле убаво.
Смесата од јатки потоа ја ставив во подлабок сад, и во неа ги додадов кокосовото брашно и трошки, пецивото и ренданото чоколадо. Измешав добро со голема лажица.
Во друг сад со миксер ги изматив јајцата и кокосовиот шеќер, а во таа смеса на крај го додадов и кокосовото масло. Течната смеса ја соединив со претходната сува смеса. На видеото можете да видите каква треба да биде густината. Потребно е да можете со раце да правите мали топчиња кои потоа со виљушка ќе ги потиснете одозгора за да станат плоснати.
Бонус совет за да не ви се лепи виљушката е да ја топите во вода на секое притискање.
Се печат во загреаната рерна на 160˚С околу 10-12 минути. Мора да ги следите затоа што сè зависи од вашата рерна. Кај мене е многу јака, па за 10 минути беа готви. Ќе видите кога ќе заруменат, вадете ги одма. 😊
И тоа е тоа, не можам да ви опишам колку се вкусни. Можат да се комбинираат за ужинка или појадок во различни комбинации.
Ве очекувам со тагови на стори! 😉
