Одлична комбинација на вкусни и здрави намирници. Овој колач/тарт е одличен десерт за секој период од годината затоа што се подготвува со банани, куркума и јаткасти плодови кои ги имаме постојано. Бананите се здрави намирници полни со многу калиум, а куркумата пак е вистинска ризница на многу здравствени благодети. Јаткастите плодови се богати со многу здрави масти кои го чуваат нашето кардиоваскуларно здравје.
Количината на состојките кои ги користевме е доволна за подготовка на 4 парчиња од овој колач. Калапот за тарт кој го користевме е со дијаметар од 17 cm. Овој калап изгледа како на сликата подолу.
Еве ги потребните состојки за колачот:
за кората:
- 50 g мелени непечени бадеми
- 50 g мелени непечени лешници
- 10-12 суви урми (киснати во вода барем 1 час)
- 4 супени лажици кокосово брашно
за филот:
- 2 замрзнати банани
- 50 g непечени индиски ореви (киснати во вода 1 час)
- 1 мала лажичка куркума
- 1 мала лажичка мед (бананите сами по себе се благи, така што медот додадете го опционално доколку сакате)
Начин на подготовка:
Бадемите, лешниците и урмите ставете ги во сецко/блендер и мешајте дури убаво не се соединат. Потоа сместа истурете ја во друг сад и додадете го кокосово брашно. Кога убаво ќе се соединат состојките истурете ја смесата во калапот за тарт и убаво обликувајте ја дури не добиете структура на кората во форма каков што е калапот. Потребно е во средината да имате една вдлабнатина во која ќе го истурите филот.
Филот се подготвува така што во блендер ќе ги ставите замрзнатите банани, потоа ќе ги додадете омекнатите индиски ореви и куркумата. Се меша дури не се добие густа и еднолична смеса. Вака подготвениот фил истурете го во садот со кората и одозгора декорирајте по желба.
За да можете лесно да го сечете колачот и лесно да ги извадите парчињата, потребно е го оставите во замрзнувач минимум 1 час.
Добар апетит!
Повеќе рецепти за подготовка на здрави десерти пронајдете тука.
Аеробик и пилатес инструктор, Сопственик на FitLife Fitness Studio, Магистeр по фармација и диететика.