Најчестите грешки кои се прават за време на вежбање

Споделете со пријателите

Искуство од сала низ годините ми покажува кои се најчестите позиции кај кои се греши при изведување на вежбите. Понекогаш тоа грешење е од незнаење, некогаш се во прашање некои деформитети кои попречуваат во правилно поставување на телото, а понекогаш луѓето едноставно брзаат за што побрзо да ја одработат вежбата.

Со оглед на моменталната ситуација, кога речиси сите вежбаме дома, мислам дека е вистинско време да ги потенцирам позициите на кои особено треба да се внимава. На видеото кое е на крај од текстот изделив 6 најчести позиции (иако има многу) и демонстрирав како е погрешно, а како е правилно да се прават вежбите.

Подолу е и целосно објаснување за сите позиции со цел да се добие појасна слика.

  • Обичен чуч

Ова е една од наједноставните и најчесто правени вежби и баш затоа ја избрав. При изведување на обичен чуч мораме да внимававме на неколку работи. Грбот мора да биде исправен, главата да биде во продолжение на ‘рбетот, а стомачните да бидат цврство стегнати. При спуштање кон долу задникот го носиме назад како да сакаме да седнеме на мало детско столче и се трудиме колената да не ни ги поминат прстите на нозете. Едноставно, кога сте во најдолната позиција треба да ги гледате палците на нозете. Кога сме долу земаме длабоко воздух, а кога се исправаме кон горе издишуваме.

  • Широк чуч

Широкиот чуч е варијација на претходната вежба која се прави со широко отворени колена. Најчестата грешка тука е лоша поставеност на грбот и лоша поставеност на нозете. Кога се спуштате кон долу колената треба да одат на страна и да се разминуваат, а не да се спојуваат и грбот мора да биде исправен. Поставете ги нозете широко, петите свртете ги на внатре, а прстите нанадвор, стегнете го стомакот, исправете го грбот и со ваква почетна позиција пробајте да се спуштите најдлабоко долу. Истото правила за дишење важи и тука. Долу вдишуваме, а горе издишуваме.

  • Пленк

Двете грешки кои се прават со пленкот се недоволно стегање на стомачните и пропаѓање на половината ниско, а другата грешка е високо поставување на телото со задникот горе. Двете грешки се демонстириани на видеото така што ќе ви стане јасно на кои позиции мислам. При изведување на оваа вежба мораме да трудиме телото да биде цврсто стегнато, тука покрај стомакот и грбот, ги стегаме и рацете, рамењата, нозете и се трудиме во таква цврста позиција да останеме некое време. Доколку се изморите, застанете, направете пауза па продолжете, но не дозволувајте да се прекрши грбот, затоа што така ризикувате да направите некоја повреда.

  • Женски склекови

Женските склекови се всушност варијација на стандарден склек само се прават со колена на земја.  Најчестата грешка тука е во поставување на задникот високо горе со што грбот и стомачните практично се олабавени и движењето со рацете е механичко и неправилно. Правилното поставување на позицијата е така што кога сте спуштени на колена се спушта и задникот ниско. Во таа позиција свртете се и погледнете дали грбот е исправен, ако е исправен тогаш спуштете се долу и исправете се. Кај склекот долу се вдишува, а горе се издишува.

  • Стомачни

Варијации на стомачни има многу, со тоа и грешки има многу, но овде ја издвоив најчестата позиција. Многу од вежбачите понекогаш ми се жалат дека после стомачни ги боли вратот. Причината лежи во фактот што при правење на стомачните тие не го стегаат стомакот, туку за се подигаат со буткање од вратот, што е многу погрешно. Вратот и главата треба да бидат опуштени, стомакот треба да биде цврсто стегнат и при правење на стомачни контракциите да ги правиме со абдоминалните мускули. Кај стомачните секогаш кога сме долу вдишуваме, а горе издишуваме.  

  • Истегнување

Флексибилноста е индивидуална работа, секој има своја граница, но правилното истегнување е клучно за превенција од повреди, за намалување на напнатоста и болката во мускулите следниот ден. Вежби за истегнување има многу, но на видеото јас направив демонстрација на една. Кога сме во позиција со широки нозе и сакаме да се тегнеме напред, тегнењето не го правиме со буткање на главата кон под. Грбот треба да го исправиме и да се трудиме целиот грб и целиот горен дел да го спуштиме кон долу. Не мора длабоко, сите сме различно флексибилни, дури да останете и горе и да се свиткате само 10 степени ќе почувствувате убаво тегнење во нозете.

Останете дома и останете активни! Вежбањето во домот во кругот на најблиските може да биде и попријатно од вежбање во сала.

Ве очекуваме на online фитнес дружење!

Драгана Младеновска

Аеробик и пилатес инструктор, Сопственик на FitLife Fitness Studio, Магистeр по фармација и диететика.

Leave a Reply

Your email address will not be published. Required fields are marked *