Интегрален колач со замрзнати јагоди

Искрено не знам дали бев толку гладна или навистина го погодив рецептот, но изедов цели 3 парчиња и вечерта се вратив по уште едно! 😊

Овој колач е одличен за ужинка или пак за појадок заедно со овошје како додаток. Го направив пред два дена, и вечерта кога беше топол го јадевме за ужинка, а следното утро Ана го јадеше за појадок со парченца банана и сок од портокал.

Потребни состојки (16 парчиња):

• 1 чаша интегрално пченично брашно
• 1 чаша мелени овесни снегулки
• ½ прашок за пециво
• 1/3 чаша маслиново масло
• 2 јајца
• 3 лажици кисело млеко
• 2 лажици мед
• ванила (по желба)
• 50 g суво грозје
• 50 g сува брусница
• замрзнати јагоди (од око ставив)
• 2 лажици путер од лешник.

Начин на подготовка:

Јајцата, киселото млеко, маслиновото масло, медот и ванилата ги ставате во блендер дури не се добие убава хомогена смеса.

Во друг сад го мешате брашното, овесните снегулки, сувата брусница, сувото грозје и прашокот за пециво. На крај ги соединувате двете смеси и ставате во плехче на хартија за печење.

Се пече во загреана рерна на 180˚С околу 20 минути. Ќе проверите со чепкалка дали е суво внатре. Може да ја оставите и подолго внатре, а можете да ја покриете и со фолија за да не изгори одозгора.

Времето и начинот на печење многу зависат од рерната и од нејзината јачина, затоа што не сите рерни се исти.

Заради јагодите колачот е малку влажен, но не плашете се дека не е испечен внатре. Кога ќе се подизлади ставете одозгора од путерот од лешници и уживајте!

Добар апетит. 🙂