Наместо кифлички оваа година направете ја трпезата малку поинаква, подгответе ја оваа интегрална пита со моркови и сирење.
Состојките ќе ги изразувам со чаша затоа што така мерев. Мојата чаша беше обична за чај околу 200 ml, но каква и да изберете битно е само сè да мерите со иста за да се запази односот.
Потребни состојки:
- 1 чаша овесни снегулки
- 2 чаши интегрално пченично брашно
- 1 чаша пченкарно брашно
- 2 лажици чиа семе
- 3 лажици 4 мелени семиња (лен, сусам, сончоглед и семки од тиква)
- 1 лажица пециво
- малку сол
- 2-3 свежи рендани моркови
- 150 g рендано сирење (можете да ставите и повеќе)
- 3 јајца
- ½ чаша маслиново масло
- 1 чаша кисела вода
- 1 чаша јогурт.
Начин на подготовка:
Состојките вака личат дека се многу, но сите се едноставни и сигурна сум дека скоро сè од ова имате дома. Подготовката е навистина лесна.
Прво со миксер (може и во блендер) ги изматив јајцата, јогуртот, киселата вода и маслото. Во таа смеса го додадов ренданото сирење и моркови, и со лажица убаво измешав.
Во друг поголем сад ги измешав брашната, чиа семето, мелените семиња, пецивото и солта.
На крај двете смеси убаво ги соединив, и добиената смеса ја истурив во малку поголемо правоаголно плехче, кое претходно го премачкав со маслиново масло за полесно да ми се одлепи. Може да користите и хартија за печење.
Одозгора наросив малку ленено семе и сончоглед, и печев во загреана рерна на 160-180˚С околу 20 минути. За печењето верувајте ѝ на својата рерна и проверувајте. Мојата е многу јака и не знам дали кај сите за истото време ќе се испече. Секогаш проверувајте со чепкалка, ако е сува кога ја извадите, значи готова е.
Епа толку е дечки! 😊
Од овие состојки јас добив поголема количина, некаде околу 24 парчиња со супер големина.
Среќни празници и на здравје!
