Состојки за тестото:
- 4 јајца
- 3 лажици оризово брашно (или пченкарно)
- 2 лажички какао (или рогач)
- 1 лажичка пециво.
Начин на подготовка на тестото:
Најпрвин одделете ги белките и жолчките од јајцата, и убаво изматете ги белките до бела густа пена. Потоа останатите состојки убаво измешајте ги со жолчките, и со помош на силиконска шпатула или лажица полека постепено и нежно измешајте ги белките со останатата смеса. Ќе добиете многу нежно тесто. Ставете го во плехче на хартија за печење и убаво со шпатула распределете го за да добие форма на правоаголник (не многу дебел слој). Печете во загреана рерна на 160˚С, 10 минути.
Потоа готовото тесто извадете го од рерна и покријте го со мокра крпа, па завиткајте во форма на ролат и оставете малку да се олади. Со овој чекор му ја даваме на тестото посакуваната форма, за да можеме после да го филуваме.
Состојки за кокосов крем (фил):
- 50 g кокос (трошки или кокосов чипс)
- 1 лажичка кокосово масло
- 100 g несолена урда
- 2 лажици кокосово млеко (или некое друго)
- мед (може стевиа или кој било засладувач што го користите)
Начин на подготовка на кремот и филување:
Сите состојки ставете ги во блендер или сецко и добро измешајте ги. Ако користите мед ќе добиете смеса густа како за чизкејк, а ако користите некој сув засладувач, додајте малку млеко плус.
Кога тестото малку ќе се олади полека извадете ја мократа крпа и премачкајте го со кремот, па завиткајте повторно.
За одозгора само стопете едно црно чоколадо.
Мислам дека и од сликите можете да ја почувствувате неодоливоста на овој десерт кој го направи Елена Ѓорѓиевска.
