Интересни факти и информации за мешунките кои можеби не сте ги знаеле

Споделете со пријателите

Редовното консумирање на мешунки се поврзува со многу здравствени придобивки, а тоа е така заради нивниот нутритивен состав. Мешунките се едни од најдобрите извори на растителни протеини и тоа најмногу протеини има во леќата (од 22 до 28 g во 100 g во зависност од видот) и во наутот (20 до 25 g во 100 g). Освен што содржат добар процент на растителни протеини мешунките се одличен извор и на растителни влакна и тоа од 15 до 20 g во 100 g во зависност од видот што претставува повеќе од половина од дневната препорачана количина.

Зошто некои луѓе имаат потешкотии со варењето кога јадат мешунки?

Сировите мешунки содржат во себе фитинска киселина која е антинутритиент. Таа во цревата гради комплекси со железото, цинкот и калциумот и ја спречува нивната апсорпција. Фитинската киселина се распаѓа во вода со киснење и варење на мешунките. Затоа речиси секогаш во сите мои објави ви потенцирам да ги киснете и мешунките и житарките пред подготовка.

Мешунките содржат и лектини кои преставуваат фамилија на протеини кои можат да сочинуваат дури 10% од вкупните протеини кои ги има во мешунките. Тие се резистентни на дигестија и можат да влијаат врз ендотелните интестинални клетки. Еден добро проучен лектин е фитохемаглутининот кој во најголема концентрација го има во гравот. Овој лектин е може да биде опасен доколку се внесе во телото во високи дози. За среќа со киснење и варење на мешунките се намалува концентрацијата на лектините и нивната количина во таков случај не е доволна за да предизвика негативни ефекти.

Поради лектините и големиот процент на влакна некои луѓе се сензитивни и консумацијата на мешунки им предизвикува изразени нелагодности во гастроинтестиналниот тракт.

Зошто е значајна количината на растителни влакна во мешунките?

Мешунките содржат два типа на растителни влакна: нерастворливи (резистентен скроб) и растворливи влакна.

Двата типа на влакна се резистентни на дигестија па ги поминуваат тенките црева и стигнуваат до колонот (дебелото црево) каде што “ги храната добрите бактерии”.

Негативните ефекти на овие влакна вклучуваат појава на гасови и надуеност, но од друга страна пак помагаат во формирање на масни киселини со краток ланец кои можат да го подобрат здравјето на дебелото црево и да го намалат ризикот од рак на дебелото црево. Исто така количината на влакна е многу значајна затоа што ја забавува апсорпцијата на макронутритиентите од мешунките, а со тоа вие останувате сити подолг временски период.

Мешунките се поврзуваат и со други здравствени придобивки. Постојат многу студии кои потврдуваат дека помагаат за намалување на крвниот притисок, намалување на нивото на холестерол, го намалуваат ризикот од развој на кардиоваскуларни болести и помагаат во намалување и контрола на тежината.

Заклучок:

Нутритивниот профил на мешунките ги сместува во групата на супернамирници од растително потекло со супер протеински состав и процент на влакна. Количината на фитнска киселина и лигнани кои се поврзуваат со негативните ефекти на мешунките се намалува доколку се киснат и варат.

Правилно подготвените мешунки се значајни како дел од балансираната исхрана.

Вклучете ги задолжително!!!   

Драгана Младеновска

Аеробик и пилатес инструктор, Сопственик на FitLife Fitness Studio, Магистeр по фармација и диететика.

Leave a Reply

Your email address will not be published. Required fields are marked *