Колачињата не се ништо генијално, но се преедноставни за правење. Можат да бидат супер ужинка или пак дури и појадок. Немаат брашно, млеко, нити пак јајца.
Од состојките излистани подолу ние добивме 14 колачиња.
Еве што ставивме:
- 200 g мелени овесни снегулки
- 1 и пол зрела банана – ако ви се помали бананите може и 2 или само 1 поголема
- 2 лажици путер од кикиритки од Fit Delights – можете да си нарачате тука
- 1 или 2 лажици мед – зависи колку благо сакате да биде
- 2 лажици маслиново масло
- малку цимет
- 50-тина g суво грозје
за одозгора:
- околу 50 g темно чоколадо
- кокосови трошки
- мелени бадеми.
Подготовка:
Подготовката можете да ја видите на видеото.
Се мешаат сите состојки заедно и од сместа формирате топчиња како бомбици. Ги ставате топчињата на хартија за печење и со виљушка претходно натопена во вода (за да не се лепи) потиснувате од горе. Ги печевме кратко, околу 12-тина минути и тоа јас печев на 160С со вклучен вентилатор. Во однос на печењето ќе морате да следите, но тоа е правилото, не многу долго и на не многу јако.
За да ги декорираме одозгора стопив темно чоколадо и врз секое колаче ставив малку, додека сеуште беше топло чоколадото за да се залепи наросив кокосов чипс и мелени бадеми.
Уживање беа 🙂 Дефинитивно ќе се прават повторно.
