Рижото со зеленчук и интегрален ориз

Споделете со пријателите

Зошто интегрален ориз?

Затоа што интегралниот ориз го содржи зрното ориз со лушпата и има многу повеќе влакна и витамини од белиот ориз.

Интегралниот ориз има 4 пати повеќе магнезиум и влакна отколку белиот ориз и скоро двојно повеќе селен. Содржи и 25% повеќе протеини од белиот ориз.

Состојки (за двајца возрасни и дете од 1 година):

1 чаша интегрален ориз
½ тиквица
2 млади кромитчиња
2 моркови
малку зелена зелка
малку виолетова зелка
магдонос
спанаќ
маслиново масло
сол, црн бибер и лук
1 лажичка сенф.

Начин на подготовка:

Оризот го варам посебно во сад со повеќе вода, значи не додавам ништо освен вода. Го чекам да зоврие, а после го намалувам на тивко. Кога целосно ќе омекне го тргам од оган и го ставам во цедалка за да се исцеди вишокот вода, а во меѓувреме си го подготвувам зеленчукот. Кога имам време го оставам и претходно да покисне во ладна вода и неколку пати го измивам (поради фитинската киселина).

Сите зеленчуци ги сечкам на коцки и ги ставам во тава со капак што не лепи со многу малку масло. Бидејќи тавата е покриена тие практично се готват од водата која ја пуштаат. Кога ќе омекнат, го додавам претходно исцедениот ориз, зачините и на крај сенфот. Мешам се заедно и ручекот е готов!

Лесно, нутритивно и вкусно!

Уживавме и ние и Ана! Обично секогаш кога на мени е ориз го јаде со кисело млеко, но денес зеленчуците беа победници и не сакаше ни да помириса од киселото млеко.

Ние го јадевме со свежа салата од марула и ротквица.