Стигнавме до крајот, денес е последниот ден од нашиот предизвик 7 дена свежи салати. Очекувајте наскоро водич со сите 7 рецепти кои ќе можете да си го испечатите и да си го чувате во кујната со цел одвреме-навреме да ве потсети да се предизвикате и 7 дена повторно за вечера да се храните само со свежи салати.
За денес комбинација од авокадо и краставица.
Ден 7
Салата со авокадо и краставица
Зошто авокадо?
Авокадото е карактеристично овошје со кремаст вкус. Калоричноста на авокадото потекнува од мастите и затоа неговата хранлива вредност се изедначува со онаа на јаткастите плодови и семињата. Авокадото е богато со мононезаситени масти, растителни влакна, витамини (А, Е и К) и многу минерали (железо, бакар, магнезиум и манган).
Во авокадото исто така се наоѓа и голема концентрација на танини кои се познати по своите антивоспалителни, антиоксидантни и антиулкусни својства. Во мала концентрација се наоѓаат и флавоноиди кои спаѓаат во групата на полифенолни антиоксиданси кои штитат од слободните радикали. Свежото авокадо е и многу добар извор на калиум, важен за регулација на работата на срцето и одржување на нормални вредности на крвениот притисок.
Потребни состојки:
- 1 поголема краставица
- неколку листови марула
- 1 авокадо
- 2-3 чешниња лук
- сок од половина лимон
- 1 мала лажичка маслиново масло
- сол и зачини по желба
Начин на подготовка:
Краставицата и марулата насечкајте ги и ставете ги во подлабок сад. Потоа додадете го авокадото насечкано на коцки. Лукот истолчете го и помешајте го со лимоновиот сок, маслиновото масло, солта и зачините кои ги сакате. Со овој сос прелијте ја салатата.
Добар апетит!
Рецептите од претходните 6 дена од предизвикот 7 дена свежи салати пронајдете ги тука.
Аеробик и пилатес инструктор, Сопственик на FitLife Fitness Studio, Магистeр по фармација и диететика.
English